ഇടവക സമൂഹത്തിന്റെ കൂട്ടായ്മയായി വാച്ച് പാർട്ടി
കാരോൾട്ടൻ, ടെക്സാസ്: ആത്മീയതയുടെ ധന്യനിമിഷങ്ങൾക്ക് ശേഷം കായിക ലോകത്തെ ഏറ്റവും വലിയ മാമാങ്കത്തെ നെഞ്ചിലേറ്റി കാരോൾട്ടൻ സെന്റ് മേരീസ് മലങ്കര യാക്കോബായ സുറിയാനി ദേവാലയം. ഞായറാഴ്ച വിശുദ്ധ കുർബാനയ്ക്ക് ശേഷം ദേവാലയ ഹാളിൽ ഇടവക മാനേജിങ് കമ്മിറ്റിയുടെയും യുവജനങ്ങളുടെയും സംയുക്ത ആഭിമുഖ്യത്തിൽ പ്രത്യേക വേൾഡ് കപ്പ് ഫുട്ബോൾ ഫൈനൽ വാച്ച് പാർട്ടി സംഘടിപ്പിച്ചു. വലിയ സ്ക്രീനിൽ ഒരുക്കിയ തത്സമയ സംപ്രേക്ഷണം കാണുവാൻ മുതിർന്നവരും കുട്ടികളും ഉൾപ്പെടെ വൻ ജനവലിയാണ് ദേവാലയ ഹാളിലേക്ക് ഒഴുകിയെത്തിയത്.
ഇടവക മാനേജിങ് കമ്മിറ്റി അംഗങ്ങളുടെയും വിശ്വാസികളുടെയും പൂർണ്ണമായ സഹകരണത്തോടെയും ഒരുമയോടെയും നടന്ന പരിപാടിയിൽ ഇടവകാംഗങ്ങളും യുവജനങ്ങളും കുടുംബാംഗങ്ങളും വലിയ ആവേശത്തോടെയാണ് പങ്കെടുത്തത്. രണ്ട് പ്രമുഖ രാജ്യങ്ങളെ പിന്തുണയ്ക്കുന്ന ആരാധകർ പരസ്പരം സൗഹൃദപരമായ അന്തരീക്ഷത്തിൽ മത്സരത്തിന്റെ ഓരോ നിമിഷവും നെഞ്ചിടിപ്പോടെയും ആവേശത്തോടെയും ആസ്വദിച്ചു. ഗോൾ മുഹൂർത്തങ്ങളും നിർണായക നീക്കങ്ങളും വലിയ കൈയടികളോടും ആർപ്പുവിളികളോടും കൂടിയാണ് കാണികൾ സ്വീകരിച്ചത്.
ആരാധനയും സാമൂഹിക കൂട്ടായ്മയും കായിക ആവേശവും സമന്വയിപ്പിച്ച ഈ വേറിട്ട പരിപാടി വിശ്വാസികൾക്ക് ആത്മീയമായ അനുഭവത്തിനൊപ്പം മാനസികമായ ഉന്മേഷവും പകരുന്ന ഒന്നായി മാറി."
സമൂഹത്തിന്റെ ഐക്യവും സഹോദര്യവും വളർത്തുന്നതിനൊപ്പം പ്രവാസ ലോകത്ത് വളരുന്ന പുതിയ തലമുറയിലെ യുവജനങ്ങൾക്കും കുടുംബങ്ങൾക്കും ഒരുമിച്ച് സമയം ചെലവഴിക്കാനും പരസ്പരം കൂടുതൽ പരിചയപ്പെടാനും അവസരമൊരുക്കുക എന്ന ലക്ഷ്യത്തോടെയാണ് ഈ വാച്ച് പാർട്ടി സംഘടിപ്പിച്ചതെന്ന് സംഘാടകർ അറിയിച്ചു. പ്രവാസജീവിതത്തിന്റെ തിരക്കുകൾക്കിടയിൽ ഇത്തരം ഒത്തുചേരലുകൾ വലിയൊരു ആശ്വാസവും ഊർജ്ജവുമാണെന്ന് പങ്കെടുത്ത കുടുംബങ്ങൾ സാക്ഷ്യപ്പെടുത്തി.
ഇടവകയിലെ യുവജനങ്ങളുടെ സജീവ പങ്കാളിത്തവും സന്നദ്ധ പ്രവർത്തകരുടെ മികച്ച ഏകോപനവും പരിപാടിയുടെ വൻ വിജയത്തിൽ നിർണായക പങ്കുവഹിച്ചു. കായികപ്രേമികൾക്കായി പ്രത്യേക ലഘുഭക്ഷണങ്ങളും ക്രമീകരിച്ചിരുന്നു. ഭാവിയിലും ഇത്തരം സമൂഹകേന്ദ്രീകൃതമായ പരിപാടികൾ സംഘടിപ്പിച്ച് ഇടവകാംഗങ്ങൾ തമ്മിലുള്ള സൗഹൃദവും ഐക്യവും കൂടുതൽ ശക്തിപ്പെടുത്തുമെന്ന് ഭാരവാഹികൾ വ്യക്തമാക്കി. വിശുദ്ധ കുർബാനയുടെ ആത്മീയ അനുഭവത്തിന് ശേഷം ലോകകപ്പ് ഫൈനൽ ഒരുമിച്ച് ആസ്വദിക്കാൻ ലഭിച്ച ഈ അവസരം ഇടവകാംഗങ്ങൾക്ക് തികച്ചും വ്യത്യസ്തവും സന്തോഷകരവുമായ അനുഭവമായി മാറി.
ദേവാലയ മാനേജിങ് കമ്മിറ്റി അംഗം സാജുമോൻ മത്തായി അറിയിച്ചതാണിത്.
