നടി മഞ്ജു പിള്ളയുടെ മകൾ ദയ സുജിത്തിനെതിരെ സോഷ്യൽ മീഡിയയിൽ അധിക്ഷേപകരമായ പരാമർശങ്ങൾ നടത്തിയ വ്ലോഗർ ഷെഫീന ബീവിക്കെതിരെ രൂക്ഷവിമർശനവുമായി അവതാരക രഞ്ജിനി ഹരിദാസ് രംഗത്ത്. കൊലപാതകം നിയമപരമായിരുന്നെങ്കിൽ ഇത്തരക്കാർ തന്റെ ‘ലിസ്റ്റിലുണ്ടാകുമായിരുന്നു’ എന്ന് രഞ്ജിനി തുറന്നടിച്ചു. തനിക്കൊപ്പം ജാൻമണിയും പങ്കെടുത്ത യുട്യൂബ് വീഡിയോയിലൂടെയാണ് രഞ്ജിനി തന്റെ പ്രതിഷേധം രേഖപ്പെടുത്തിയത്.

തന്റെ കരിയറിന്റെ തുടക്കകാലത്ത് വസ്ത്രധാരണത്തിന്റെ പേരിൽ താൻ അനുഭവിച്ച സമാനമായ സൈബർ ആക്രമണങ്ങളെക്കുറിച്ചും രഞ്ജിനി ഓർമ്മിപ്പിച്ചു. പതിറ്റാണ്ടുകൾക്കിപ്പുറവും സമൂഹത്തിലെ ഇത്തരക്കാരുടെ മനോഭാവത്തിൽ യാതൊരു മാറ്റവും വന്നിട്ടില്ലെന്ന് അവർ ചൂണ്ടിക്കാട്ടി.

Also Read: ജയിൽ ജീവിതം പകർന്നുനൽകിയ പാഠങ്ങൾ; ക്ഷമയുടെ മഹത്വം പഠിപ്പിച്ചത് ഒരു കോൺസ്റ്റബിൾ: സഞ്ജയ് ദത്ത്

പ്രധാന വിമർശനങ്ങൾ

ഷെഫീന ബീവിയോട്: “നിങ്ങൾക്ക് എന്താണ് പ്രശ്നം? ശ്രദ്ധ നേടലാണോ ഉദ്ദേശം? സമൂഹത്തിൽ ഇങ്ങനെ വിഷം തുപ്പുന്നത് നിങ്ങളുടെ ജീവിതത്തിലെ എന്തോ കടുത്ത പ്രശ്‌നങ്ങൾ കൊണ്ടാണ്. നിങ്ങൾക്ക് സഹായം ആവശ്യമാണ്. ആരും പറയാതെ തന്നെ ഒരു കുട്ടിയെ എങ്ങനെ വസ്ത്രം ധരിക്കണമെന്ന് തീരുമാനിക്കാൻ നിങ്ങൾക്ക് അവകാശമില്ല,” രഞ്ജിനി പറഞ്ഞു.

നിയമനടപടി: സോഷ്യൽ മീഡിയ ഉപയോഗിച്ച് മോശമായി സംസാരിക്കുന്നവരെ പൂട്ടാൻ നിയമമുണ്ടെന്നും, നിയമപരമായി നീങ്ങിയാൽ ഇത്തരക്കാരുടെ ചാനലുകൾ പൂട്ടിക്കാൻ സാധിക്കുമെന്നും അവർ മുന്നറിയിപ്പ് നൽകി.

ജാൻമണിയുടെ പിന്തുണ: ഷെഫീനയ്‌ക്കെതിരെ നിലവിൽ 62 പരാതികൾ ഉണ്ടായിട്ടും എന്തുകൊണ്ട് നടപടിയെടുക്കുന്നില്ല എന്ന് ജാൻമണി ചോദിച്ചു. ഒരു സ്ത്രീയെ മറ്റൊരു സ്ത്രീ ഇത്രയും മോശമായി അധിക്ഷേപിക്കുന്നത് അംഗീകരിക്കാനാവില്ലെന്നും ജാൻമണി കൂട്ടിച്ചേർത്തു.

സമൂഹത്തിന്റെ മനോഭാവം മാറുന്നുണ്ടെന്നും, ഇന്ന് ഇരകൾക്ക് വേണ്ടി പ്രതികരിക്കാൻ വലിയൊരു വിഭാഗം ആളുകൾ മുന്നിലുണ്ടെന്നത് സന്തോഷകരമാണെന്നും രഞ്ജിനി പറഞ്ഞു. സൈബർ ഇടങ്ങളിലെ അശ്ലീല അധിക്ഷേപങ്ങൾക്കെതിരെ ശക്തമായ നിയമനടപടികൾ വേണമെന്ന ആവശ്യം വീണ്ടും ശക്തമാവുകയാണ്.