ഡാളസ്: ഗാർലാൻഡ് സിറ്റി കൗൺസിൽ ഡിസ്ട്രിക്ട് 3-ലേക്ക് 2027 മേയ് 1-ന് നടക്കുന്ന മുനിസിപ്പൽ തിരഞ്ഞെടുപ്പിൽ പ്രമുഖ സാമൂഹിക പ്രവർത്തകനായ പി. സി. മാത്യു മത്സരിക്കും. ഇന്ത്യൻ കമ്മ്യൂണിറ്റിയെ പ്രതിനിധീകരിക്കുന്ന സണ്ണി മാളിയേക്കലാണ് ഇക്കര്യം ഔദ്യോഗികമായി അറിയിച്ചത്.
മേഖലയിലെ പ്രമുഖ പൊതുപ്രവർത്തകനും ബിസിനസുകാരനുമായ പി. സി. മാത്യുവിന് സിറ്റി ഭരണരംഗത്തും വിവിധ കമ്മീഷനുകളിലും പ്രവർത്തിച്ച് മികച്ച പരിചയസമ്പത്തുണ്ട്. നിലവിൽ മേയറുടെ നോമിനിയായി ഗാർലാൻഡ് ബോർഡിൽ സേവനമനുഷ്ഠിച്ചു വരികയാണ് അദ്ദേഹം. 2022-ൽ ഗാർലാൻഡ് ECAB-ലും, 2024-ൽ ഡിസ്ട്രിക്ട് 3-നെ പ്രതിനിധീകരിച്ച് സീനിയർ സിറ്റിസൺ കമ്മീഷണറായും അദ്ദേഹം പ്രവർത്തിച്ചിട്ടുണ്ട്.
മുൻപ് 2021-ൽ നടന്ന മുനിസിപ്പൽ തിരഞ്ഞെടുപ്പിൽ ശക്തമായ ജനപിന്തുണയോടെ റൺ ഓഫ് സ്ഥാനാർത്ഥിയായി (രണ്ടാം സ്ഥാനം) അദ്ദേഹം എത്തിയിരുന്നു. 2023-ലെ തിരഞ്ഞെടുപ്പിലും സജീവ സാന്നിധ്യമായിരുന്നു. തുടർന്ന് 2025-ലെ ഗാർലാൻഡ് മേയർ തിരഞ്ഞെടുപ്പിൽ മത്സരിച്ച 6 സ്ഥാനാർത്ഥികളിൽ മൂന്നാമതെത്തുകയും, റൺ ഓഫ് തിരഞ്ഞെടുപ്പിൽ വിജയിച്ച ഡിലൻ ഹെഡ്രിക്കിന് പിന്തുണ പ്രഖ്യാപിക്കുകയും ചെയ്തു.
ഗാർലാൻഡ് സിറ്റിയുടെ ലീഡർഷിപ്പ് പ്രോഗ്രാമുകളായ ലീഡർഷിപ്പ് ഗാർലാൻഡ്, സിറ്റിസൺസ് പോലീസ് അക്കാദമി, സിറ്റിസൺസ് ഫയർ അക്കാദമി എന്നിവയെല്ലാം വിജയകരമായി പൂർത്തിയാക്കിയിട്ടുണ്ട്. റിയൽട്ടർ, ഇൻഷുറൻസ് ഏജൻസി ഉടമ എന്നീ നിലകളിൽ പ്രവർത്തിക്കുന്ന അദ്ദേഹം വേൾഡ് മലയാളി കൗൺസിൽ അമേരിക്കൻ റീജിയൻ മുൻ പ്രസിഡന്റായിരുന്നു.
നിലവിൽ ഗ്ലോബൽ ഇന്ത്യൻ കൗൺസിൽ (GIC) ഗ്ലോബൽ പ്രസിഡന്റായി പ്രവർത്തിക്കുന്ന പി. സി. മാത്യു, കേരള അസോസിയേഷൻ, കേരള ലിറ്റററി അസോസിയേഷൻ, ഇന്ത്യ കൾച്ചറൽ ആൻഡ് എഡ്യൂക്കേഷൻ സെന്റർ തുടങ്ങിയ സംഘടനകളിലും സജീവമാണ്. ഷോർസ് ഓഫ് വെല്ലിങ്ടൺ കമ്മ്യൂണിറ്റിയുടെ തിരഞ്ഞെടുക്കപ്പെട്ട പ്രസിഡന്റായും അദ്ദേഹം സേവനമനുഷ്ഠിക്കുന്നു.
"പരാജയങ്ങളാണ് വിജയത്തിന്റെ ചവിട്ടുപടികൾ" എന്ന ആത്മവിശ്വാസത്തോടെയാണ് ഇത്തവണ ജനവിധിയെ നേരിടുന്നതെന്നും വിജയം ഉറപ്പാണെന്നും പി. സി. മാത്യു വ്യക്തമാക്കി. ഡാളസ് കോളേജ് പ്രൊഫസറും അമേരിക്കൻ സമൂഹത്തിൽ പ്രമുഖനുമായ ബിൽ ഇൻഗ്രമാണ് അദ്ദേഹത്തിന്റെ ക്യാമ്പയിൻ ട്രഷറർ.
