ടൊറന്റോ : കാതോലിക്കേറ്റ് കോളേജ് പൂർവവിദ്യാർഥികളുടെ കൂട്ടായ്മയായ കാതോലിക്കേറ്റ് കോളേജ് അലുംനി അസോസിയേഷൻ (CCA) കാനഡ ചാപ്റ്ററിന്റെ പ്രവർത്തനങ്ങൾ കൂടുതൽ സജീവമാകുന്നു. അലുംനി അസോസിയേഷന്റെ പാട്രണായ അഭിവന്ദ്യ ഡോ. എബ്രഹാം മാർ സെറാഫിം മെത്രാപ്പോലീത്തയുടെ ആശീർവാദത്തോടെയും നേതൃത്വത്തോടെയും കാനഡ ചാപ്റ്ററിന്റെ ഉദ്ഘാടനം നിർവഹിക്കപ്പെട്ടു. കാനഡയുടെ വിവിധ ഭാഗങ്ങളിൽ താമസിക്കുന്ന പൂർവവിദ്യാർഥികളെ ഒരുമിപ്പിച്ച് ശക്തമായൊരു അലുംനി കൂട്ടായ്മ രൂപപ്പെടുത്തുന്നതിനുള്ള പ്രവർത്തനങ്ങളാണ് ഇപ്പോൾ പുരോഗമിക്കുന്നത്.
നവംബർ 10-ന് ചേർന്ന അഡ്ഹോക്ക് കമ്മിറ്റി യോഗത്തിൽ സംഘടനയുടെ ഭാവി പ്രവർത്തനങ്ങൾ സംബന്ധിച്ച് വിശദമായ ചർച്ചകൾ നടന്നു. അംഗത്വവികസനം, പൂർവവിദ്യാർഥികൾ തമ്മിലുള്ള ബന്ധം ശക്തിപ്പെടുത്തൽ, കുടുംബസംഗമങ്ങൾ, സാമൂഹിക-സാംസ്കാരിക പരിപാടികൾ എന്നിവയ്ക്കാണ് പ്രഥമ പരിഗണന നൽകുന്നത്.
കാനഡയിലെ കൂടുതൽ പൂർവവിദ്യാർഥികളെ സംഘടനയുമായി ബന്ധിപ്പിക്കുന്നതിന്റെ ഭാഗമായി നവംബർ, ഡിസംബർ മാസങ്ങളിൽ അംഗത്വവികസന പ്രവർത്തനങ്ങൾ ഊർജിതമാക്കും. ഇതിന്റെ ഭാഗമായി അംഗങ്ങളെ പങ്കെടുപ്പിച്ച് ഒരു ഓൺലൈൻ സൗഹൃദസംഗമവും 2027 ജനുവരി–ഫെബ്രുവരി മാസങ്ങളിൽ കുടുംബസംഗമവും സംഘടിപ്പിക്കാൻ ആലോചനയുണ്ട്.
കോളേജിന്റെ പ്ലാറ്റിനം ജൂബിലി ആഘോഷങ്ങളുടെ ഭാഗമായി കാനഡയിൽ പ്രത്യേക പരിപാടി സംഘടിപ്പിക്കുന്നതിനും യോഗം താൽപര്യം പ്രകടിപ്പിച്ചു. സെൻട്രൽ അലുംനി അസോസിയേഷൻ മുന്നോട്ടുവെച്ച വാർഷിക സ്കോളർഷിപ്പ് എൻഡോവ്മെന്റ് ഫണ്ട് പദ്ധതിയിൽ കാനഡ ചാപ്റ്ററും പങ്കാളികളാകാൻ തീരുമാനിച്ചു.
സംഘടനയുടെ പ്രവർത്തനങ്ങൾ കൂടുതൽ വിപുലീകരിക്കുന്നതിനായി കാനഡയിലെ വിവിധ പ്രദേശങ്ങളിൽ നിന്നുള്ള പൂർവവിദ്യാർഥികളെ ഉൾപ്പെടുത്തി വിപുലമായ കമ്മിറ്റി രൂപീകരിക്കുന്നതും തുടർപ്രവർത്തനങ്ങൾ സെൻട്രൽ അലുംനി അസോസിയേഷന്റെ മാർഗനിർദേശങ്ങൾക്കനുസരിച്ച് ഏകോപിപ്പിക്കുന്നതും യോഗം ചർച്ച ചെയ്തു.
കാനഡയിലെ എല്ലാ കാതോലിക്കേറ്റ് കോളേജ് പൂർവവിദ്യാർഥികളെയും ഈ കൂട്ടായ്മയിലേക്ക് സ്വാഗതം ചെയ്യുന്നതായി ഭാരവാഹികൾ അറിയിച്ചു. സംഘടനയുടെ പ്രവർത്തനങ്ങളിൽ പങ്കുചേരാനും അംഗത്വം സംബന്ധിച്ച കൂടുതൽ വിവരങ്ങൾക്കും താഴെ പറയുന്നവരുമായി ബന്ധപ്പെടാവുന്നതാണ്.
* Binu Joshua: +1 (416) 456-5358
* Ison Abraham: +1 (647) 772-3820
* Lal John: +1 (647) 241-6183
* Rini Thomas: +1 (647) 227-2041
* Subi James: +1 (416) 727-6273
കാതോലിക്കേറ്റ് കോളേജിന്റെ പൂർവവിദ്യാർഥി ബന്ധങ്ങളും സൗഹൃദവും കാനഡയിലും കൂടുതൽ ശക്തിപ്പെടുത്തി, വരുംതലമുറകൾക്കും മാതൃകയാകുന്ന ഒരു കൂട്ടായ്മയായി CCA Canada-യെ വളർത്തിയെടുക്കുകയാണ് ഈ സംരംഭത്തിന്റെ പ്രധാന ലക്ഷ്യം.
