കേരളം ഉൾപ്പെടെയുള്ള അഞ്ച് നിയമസഭാ തിരഞ്ഞെടുപ്പുകളുടെ ഫലം വരുന്നതിന് മുൻപേ തന്നെ 2027-ലെ തിരഞ്ഞെടുപ്പുകൾ ലക്ഷ്യമിട്ടുള്ള വിപുലമായ പ്രവർത്തനങ്ങൾ ബിജെപി ആരംഭിച്ചു. അടുത്ത വർഷം നിയമസഭാ തിരഞ്ഞെടുപ്പ് നടക്കാനിരിക്കുന്ന ഉത്തർപ്രദേശ്, ഗുജറാത്ത് ഉൾപ്പെടെയുള്ള ഏഴ് സംസ്ഥാനങ്ങളിൽ പാർട്ടി സംവിധാനങ്ങൾ സജ്ജമാക്കാൻ ബിജെപി ദേശീയ നേതൃത്വം നിർദ്ദേശം നൽകി. ബിജെപിയെ സംബന്ധിച്ചിടത്തോളം ഒരു തിരഞ്ഞെടുപ്പിന്റെ അവസാനം എന്നത് അടുത്ത പോരാട്ടത്തിന്റെ തുടക്കമാണെന്നും, പ്രധാനമന്ത്രി നരേന്ദ്ര മോദിയുടെയും അമിത് ഷായുടെയും മാർഗനിർദേശപ്രകാരം ദേശീയ അധ്യക്ഷൻ നിതിൻ നവീൻ ഇതിനോടകം തന്നെ നിർണ്ണായക സംസ്ഥാനങ്ങളിൽ സന്ദർശനം നടത്തിക്കഴിഞ്ഞതായും പാർട്ടി അറിയിച്ചു.

മെയ് 4-ന് വോട്ടെണ്ണൽ നടക്കാനിരിക്കുന്ന കേരളം, തമിഴ്‌നാട്, ബംഗാൾ, അസം, പുതുച്ചേരി എന്നിവിടങ്ങളിൽ വലിയ വിജയമാണ് ബിജെപി പ്രതീക്ഷിക്കുന്നത്. കേരളത്തിൽ ഇത്തവണ ഏറ്റവും വലിയ മുന്നേറ്റം ഉണ്ടാക്കാൻ സാധിക്കുമെന്ന പ്രത്യാശയിലാണ് പാർട്ടി ക്യാമ്പ്. അസമിലും പുതുച്ചേരിയിലും ഭരണം നിലനിർത്തുമെന്നും ബംഗാളിലും തമിഴ്‌നാട്ടിലും എൻഡിഎ സർക്കാർ അധികാരത്തിൽ വരുമെന്നും ബിജെപി കണക്കുകൂട്ടുന്നു. വരാനിരിക്കുന്ന നിയമസഭാ തിരഞ്ഞെടുപ്പുകൾക്ക് ഊർജ്ജം പകരുന്ന രീതിയിൽ എല്ലാ സംസ്ഥാനങ്ങളിലും താഴേത്തട്ടിലുള്ള പ്രവർത്തനങ്ങൾ ശക്തിപ്പെടുത്താനാണ് ദേശീയ നേതൃത്വത്തിന്റെ തീരുമാനം.

അതിനിടെ, ഗുജറാത്ത് തദ്ദേശഭരണ തിരഞ്ഞെടുപ്പിൽ ബിജെപി ചരിത്രവിജയം സ്വന്തമാക്കി. സംസ്ഥാനത്തെ 15 കോർപ്പറേഷനുകളിലും ബിജെപി ഭരണം പിടിച്ചെടുത്തു. അഹമ്മദാബാദ്, സൂറത്ത്, വഡോദര തുടങ്ങിയ നഗരങ്ങളിൽ കോൺഗ്രസിനെയും ആം ആദ്മി പാർട്ടിയെയും ബഹുദൂരം പിന്നിലാക്കിയാണ് ബിജെപിയുടെ മുന്നേറ്റം. പോർബന്തർ, മോർബി നഗരസഭകളിൽ ആകെയുള്ള എല്ലാ സീറ്റുകളും ബിജെപി തൂത്തുവാരി. സൂറത്തിൽ കഴിഞ്ഞതവണ മികച്ച പ്രകടനം നടത്തിയ ആം ആദ്മി പാർട്ടി ഇത്തവണ നാല് സീറ്റുകളിൽ ഒതുങ്ങിയപ്പോൾ, ജില്ലാ പഞ്ചായത്തുകളിൽ ഭൂരിഭാഗവും നേടി ബിജെപി ഗ്രാമമേഖലകളിലും തങ്ങളുടെ കരുത്ത് തെളിയിച്ചു.