യെമന് പൗരനെ കൊലപ്പെടുത്തിയ കേസില് മലയാളി യുവതി നിമിഷപ്രിയയുടെ വധശിക്ഷ നടപ്പാക്കാനുള്ള തീയതി നിശ്ചയിച്ചു. യെമന് പൗരന് തലാല് അബു മഹ്ദി കൊല്ലപ്പെട്ട കേസില് നിമിഷപ്രിയയുടെ വധശിക്ഷ ജൂലൈ 16ന് നടപ്പാക്കും. ഇതു സംബന്ധിച്ച ഉത്തരവില് യെമനിലെ പബ്ലിക് പ്രോസിക്യൂട്ടര് ഒപ്പുവച്ചു. ഇതോടെ നിമിഷപ്രിയയെ രക്ഷിക്കാനുളള നിയമവഴികളെല്ലാം അടഞ്ഞിരിക്കുകയാണ്.
2017 ജൂലൈയിലാണ് യെമന് പൗരനെ നിമിഷപ്രിയയും കൂട്ടുകാരിയും ചേര്ന്ന് കൊലപ്പെടുത്തി മൃതദേഹം വാട്ടര് ടാങ്കില് ഒളിപ്പിച്ചത്.സംഭവശേഷം രക്ഷപ്പെടാന് ശ്രമിക്കുന്നതിനിടെ പിടിയിലായ നിമിഷയെ 2018-ലാണ് യെമന് കോടതി വധശിക്ഷയ്ക്കു വിധിച്ചത്. വധശിക്ഷ യെമെനിലെ അപ്പീല്കോടതി ശരിവെച്ചെങ്കിലും കൊല്ലപ്പെട്ടയാളുടെ ബന്ധുക്കള്ക്ക് ബ്ലെഡ്മണി നല്കി മാപ്പുതേടാനുള്ള സാധ്യത തുറന്നിട്ടിരുന്നു.
അവസാനവട്ട ശ്രമം എന്ന നിലയില് യെമന് പൗരന്റെ കുടുംബവുമായി ചര്ച്ച നടത്താനുള്ള ശ്രമത്തിലാണ് മനുഷ്യാവകാശ പ്രവര്ത്തകര്. നാളെ തന്നെ കുടുംബത്തെ കാണുമെന്ന് യെമനിലെ മനുഷ്യാവകാശ പ്രവര്ത്തകന് സാമുവേല് ജെറോം അറിയിച്ചു. 10 ലക്ഷം ഡോളര് ബ്ലെഡ്മണിയായി നല്കാമെന്നാണ് കുടുംബത്തെ അറിയിക്കുക. കുടംബം മാപ്പ് നല്കുക മാത്രമാണ് നിമിഷപ്രിയയെ രക്ഷിക്കാനുള്ള ഏകമാര്ഗം. പാലക്കാട് കൊല്ലങ്കോട് സ്വദേശിനിയായ നിമിഷപ്രിയ നിലവില് സനയിലെ ജയിലിലാണുള്ളത്.
