വാഷിങ്ടൺ: അമേരിക്കൻ നികുതിദായകർക്ക് അടുത്ത വർഷം വലിയ ടാക്സ് റീഫണ്ടുകൾ ലഭിക്കാൻ സാധ്യതയുണ്ടെന്ന് റിപ്പോർട്ട്. പ്രസിഡന്റ് ഡൊണാൾഡ് ട്രംപിന്റെ നികുതി നിയമത്തിലെ മാറ്റങ്ങൾ കാരണം രാജ്യത്തെ ഏറ്റവും വലിയ റീഫണ്ട് കാലയളവ് ഇതായിരിക്കുമെന്ന് വൈറ്റ് ഹൗസ് സാമ്പത്തിക ഉപദേഷ്ടാവ് കെവിൻ ഹസെറ്റ് പ്രവചിക്കുന്നു. യുഎസ് ട്രഷറി വകുപ്പ് ഇടക്കാല സെക്രട്ടറി സ്കോട്ട് ബെസെന്റും ഇക്കാര്യത്തിൽ ഏകാഭിപ്രായമാണ് രേഖപെടുത്തിയത്.
ജൂലൈ നാലിനാണ് ട്രംപിന്റെ ' വൺ ബിഗ് ബ്യൂട്ടിഫുൾ ബിൽ ആക്ട് ' പാസാക്കിയത്. അതിനാൽ, കഴിഞ്ഞ വർഷത്തെ പല നികുതി മാറ്റങ്ങളും ആളുകൾ ഫയൽ ചെയ്ത ഫോമുകളിൽ ഉൾപ്പെടുത്തിയിരുന്നില്ല. ഈ മാറ്റങ്ങൾ ഇപ്പോൾ റീഫണ്ടുകളായി തിരികെ ലഭിക്കുമെന്ന് കെവിൻ ഹസെറ്റ് വിശദീകരിച്ചു.
ബിഗ് ബ്യൂട്ടിഫുൾ ബിൽ പാസാക്കിയത് വേനൽക്കാലത്തിന്റെ മധ്യത്തിലാണെന്ന് കെവിൻ ഹസെറ്റ് ചൂണ്ടിക്കാട്ടി. അതിനാൽ കഴിഞ്ഞ വർഷത്തെ നികുതി മാറ്റങ്ങളിൽ പലതും വർഷത്തിന്റെ തുടക്കത്തിൽ ആളുകൾ പൂരിപ്പിച്ച നികുതി ഫോമുകളിൽ ഉണ്ടായിരുന്നില്ല. അതുകൊണ്ട്, അമേരിക്കയുടെ ചരിത്രത്തിലെ ഏറ്റവും വലിയ റീഫണ്ട് കാലയളവ് നമ്മൾ കാണാൻ പോകുന്നു. ആളുകൾക്ക് വലിയ റീഫണ്ട് ചെക്കുകൾ ലഭിക്കുമെന്നും അദ്ദേഹം പറഞ്ഞു.
എന്നാൽ ഈ വലിയ റീഫണ്ടുകൾ എല്ലാവർക്കും ഒരുപോലെ ലഭിക്കില്ലെന്ന് കെവിൻ ഹസെറ്റ് പറഞ്ഞു. ട്രംപിന്റെ പുതിയ നിയമം മുൻപ് ലഭ്യമല്ലാത്ത നിരവധി നികുതി ഇളവുകൾ നൽകുന്നുണ്ട്. പ്രത്യേകിച്ച്, ടിപ്സ് (tips) ലഭിക്കുന്ന തൊഴിലാളികൾക്കും ഓവർടൈം ശമ്പളം വാങ്ങുന്നവർക്കും ഇതിന്റെ പ്രയോജനം കൂടുതലായി ലഭിക്കുമെന്ന് ഹസെറ്റ് വ്യക്തമാക്കി. ടിപ്സ് ലഭിക്കുന്ന സാധാരണ തൊഴിലാളികൾക്കും ഓവർടൈം ശമ്പളം വാങ്ങുന്നവർക്കും ആയിരക്കണക്കിന് ഡോളറിന്റെ റീഫണ്ട് ലഭിക്കുമെന്ന് അദ്ദേഹം കൂട്ടിച്ചേർത്തു.
അതേസമയം മറ്റ് സർക്കാർ ഉദ്യോഗസ്ഥരും വലിയ റീഫണ്ടുകൾ പ്രതീക്ഷിക്കുന്നുണ്ട്. അടുത്ത വർഷം ശരാശരി റീഫണ്ട് ഏകദേശം 1,000 ഡോളർ ആയിരിക്കുമെന്ന് വൈറ്റ് ഹൗസ് പ്രസ് സെക്രട്ടറി കരോലിൻ ലീവിറ്റ് ഡിസംബർ 11ന് പറഞ്ഞിരുന്നു. 2026ൽ അമേരിക്കക്കാർക്ക് വലിയ നികുതിയിളവുകൾ ലഭിക്കുമെന്നാണ് ട്രഷറി വകുപ്പ് ഇടക്കാല സെക്രട്ടറി സ്കോട്ട് ബെസെന്റിൻ്റെ പ്രതികരണം. 'ഓൾ-ഇൻ പോഡ്‌കാസ്റ്റ്' എന്ന പ്രമുഖ ബിസിനസ്, ടെക് പോഡ്‌കാസ്റ്റിൽ പങ്കെടുത്തപ്പോഴാണ് ബെസെന്റ് ഇക്കാര്യം വെളിപ്പെടുത്തിയത്. 2026ലെ ആദ്യപാദത്തിൽ വലിയ റീഫണ്ട് ആണ് വരാൻ പോകുന്നതെന്ന് അദ്ദേഹം അറിയിച്ചു.
ഒരുപക്ഷേ ഒരു കുടുംബത്തിനുള്ള റീഫണ്ട് 1,000 ഡോളർ മുതൽ 2,000 ഡോളർ വരെയാകാം എന്നും അദ്ദേഹം ചൂണ്ടിക്കാട്ടിയിരുന്നു.