മലയാള സിനിമയിൽ വലിയ ചർച്ചയായി മാറിയിരിക്കുന്ന ഉർവശി നായികയായ പുതിയ സസ്പെൻസ് ത്രില്ലർ ചിത്രം ‘ആശ’ തിയേറ്ററുകളിൽ മികച്ച പ്രദർശനം തുടരുന്നു. നവാഗതനായ സഫർ സനൽ സംവിധാനം ചെയ്ത ചിത്രത്തിൽ കയ്പേറിയ ഭൂതകാലവും അതിജീവനത്തിന്റെ കഥയും പേറുന്ന ‘ആശ’ എന്ന സങ്കീർണ്ണമായ കഥാപാത്രത്തെയാണ് ഉർവശി അവിശ്വസനീയമായി അവതരിപ്പിച്ചിരിക്കുന്നത്. ഭർത്താവിന്റെ വിയോഗത്തിന് ശേഷം പെൺമക്കളെ വളർത്തി വലുതാക്കിയെങ്കിലും, ഒരു രാത്രിയിൽ അരങ്ങേറുന്ന അപ്രതീക്ഷിത സംഭവങ്ങൾ അവരുടെ ജീവിതം തന്നെ കീഴ്മേൽ മറിക്കുന്നതാണ് സിനിമയുടെ ഇതിവൃത്തം.
ചിത്രത്തിൽ മാനസികനില തെറ്റിയതുപോലെയുള്ള സ്വഭാവവും മക്കളോടുള്ള സ്നേഹവും ഒരുപോലെ പ്രകടിപ്പിക്കുന്ന ഉർവശിയുടെ പ്രകടനം പ്രേക്ഷകരെ ഞെട്ടിപ്പിക്കുന്നതാണ്. ഒരുകാലത്ത് വലിയ ചർച്ചയായ കുമ്പളങ്ങി നൈറ്റ്സിലെ കഥാപാത്രമായ ‘ഷമ്മി’യെ ഓർമ്മിപ്പിക്കുന്ന തരത്തിലുള്ള മാനസിക വ്യാപാരങ്ങളാണ് ആശ എന്ന കഥാപാത്രത്തിനുമുള്ളതെന്ന രീതിയിൽ സമൂഹമാധ്യമങ്ങളിൽ ഇതിനോടകം തന്നെ ചർച്ചകൾ സജീവമായിട്ടുണ്ട്. ‘ആശ ഷമ്മിയുടെ അമ്മയോ’ എന്ന തരത്തിലുള്ള ട്രോളുകളും സംവാദങ്ങളും സിനിമയ്ക്ക് ലഭിക്കുന്ന സ്വീകാര്യത വർദ്ധിപ്പിക്കുന്നുണ്ട്.
ഉർവശിക്കൊപ്പം ജോജു ജോർജ്ജ്, ഐശ്വര്യ ലക്ഷ്മി, വിജയരാഘവൻ തുടങ്ങിയവരും ചിത്രത്തിൽ തകർപ്പൻ പ്രകടനമാണ് കാഴ്ചവെച്ചിരിക്കുന്നത്. മധു നീലകണ്ഠന്റെ ക്യാമറയും ഷാൻ മുഹമ്മദിന്റെ എഡിറ്റിംഗും ഗോവിന്ദ് വസന്തയുടെ പശ്ചാത്തല സംഗീതവും ചിത്രത്തെ ഒരു മികച്ച തിയേറ്റർ അനുഭവമാക്കി മാറ്റുന്നുണ്ട്. പ്രേക്ഷകരെ മുൾമുനയിൽ നിർത്തുന്ന നിഗൂഢതകളും മികച്ച മേക്കിങ്ങും കൊണ്ട് സമ്പന്നമായ ‘ആശ’ മലയാളത്തിലെ മറ്റൊരു മികച്ച ത്രില്ലർ ചിത്രമായി മാറിക്കഴിഞ്ഞു.
