ചിക്കാഗോ: ഇന്ത്യയ്ക്ക് പുറത്ത് സീറോ മലബാർ സഭയ്ക്ക് ആദ്യമായി ലഭിച്ച രൂപതയായ ചിക്കാഗോ സീറോ മലബാർ രൂപതയുടെ രൂപീകരണത്തിന് 25 വർഷം പൂർത്തിയാകുന്ന ഈ അവസരത്തിൽ, ജൂബിലി ആഘോഷങ്ങളുടെ പരിസമാപ്തിയായി സംഘടിപ്പിക്കുന്ന മഹത്തായ സിൽവർ ജൂബിലി കൺവെൻഷന്റെ ഔദ്യോഗിക കിക്കോഫ് സിയാറ്റിലിൽ സ്ഥിതിചെയ്യുന്ന ഹോളി ഫാമിലി സീറോ മലബാർ ദേവാലയത്തിൽ ആത്മീയ ഉണർവോടെയും ആഘോഷപൂർവ്വമായ അന്തരീക്ഷത്തോടെയും നടന്നു. രൂപതാധ്യക്ഷൻ മാർ ജോയ് ആലപ്പാട്ടിന്റെ നേതൃത്വത്തിലായിരുന്നു കിക്കോഫ് ചടങ്ങുകൾ.

രൂപതാധ്യക്ഷനെയും കൺവെൻഷൻ ഫസിലിറ്റി ചെയർമാൻ ജോണി വടുക്കും ചേരി , രജിസ്ട്രേഷൻ കോർഡിനേറ്റർ ജേക്കബ് തോമസ് എനിവരെയും ഇടവക വികാരി ഫാ. റാഫേൽ അമ്പാടൻ്റെ നേതൃത്വത്തിൽ ഇടവകാംഗങ്ങളും ഇടവക ഭാരവാഹികളും ചേർന്ന് അതീവ സ്നേഹപൂർവ്വവും ഊഷ്മളവുമായ സ്വീകരണം നൽകി. കൺവെൻഷൻ ഇടവക പ്രതിനിധിമാരായ സോണിമോൻ , ബെറ്റി ടോം, ബിജു മാത്യു (ട്രസ്റ്റി), ബിനീഷ് മാത്യു എന്നിവരും ട്രസ്റ്റിമാരായ ലിസ് ജോർജ്, റോബിൻ പോൾ എന്നിവരോടൊപ്പം ടോം ചെമ്പനാനിക്കലും കിക്കോഫ് പരിപാടികളുടെ ക്രമീകരണങ്ങളിലും അവതരണങ്ങളിലും സജീവമായി പങ്കാളികളായി.

കിക്കോഫ് സമ്മേളനത്തിന്റെ ഭാഗമായി നടത്തിയ മുഖ്യ സന്ദേശത്തിൽ മാർ ജോയ് ആലപ്പാട്ട്, സീറോ മലബാർ സഭയുടെ അമേരിക്കയിലെ വളർച്ചയും ദൗത്യപരമായ മുന്നേറ്റവും ഓർമിപ്പിച്ചു. വിശ്വാസ സംരക്ഷണം, കുടുംബ മൂല്യങ്ങൾ, യുവജനങ്ങളുടെ പങ്കാളിത്തം, സഭാ ഐക്യം എന്നിവ ശക്തിപ്പെടുത്തുന്നതിനുള്ള അപൂർവ അവസരമാണ് ഈ സിൽവർ ജൂബിലി കൺവെൻഷനെന്ന് പിതാവ് വിശദീകരിച്ചു. വിശ്വാസവും അറിവും സൗഹൃദവും പങ്കുവയ്ക്കുന്ന ഒരു അനുഗ്രഹീത വേദിയായി ഈ കൺവെൻഷനെ കാണണമെന്നും, പ്രത്യേകിച്ച് യുവജനങ്ങളെയും പുതുതലമുറയെയും ഇതിലേക്ക് ആകർഷിക്കേണ്ടത് സഭയുടെ ഉത്തരവാദിത്വമാണെന്നും അദ്ദേഹം ആഹ്വാനം ചെയ്തു. ഇടവകവികാരി ഫാ.റാഫേൽ അമ്പാടൻ പരിപൂർണ സഹകരണം വാഗ്ദാനം ചെയ്തു.

തുടർന്ന് കൺവെൻഷൻ ഭാരവാഹികളായ ജോണിയും ജേക്കബും കൺവെൻഷന്റെ ദർശനം, ലക്ഷ്യങ്ങൾ, രജിസ്ട്രേഷൻ സംവിധാനങ്ങൾ, സ്പോൺസർഷിപ്പ് സാധ്യതകൾ, വിവിധ സെഷനുകളുടെയും പരിപാടികളുടെയും ഘടന എന്നിവ വിശദമായി അവതരിപ്പിച്ചു. ഈ മഹാകൺവെൻഷനോടനുബന്ധിച്ച് രൂപതയുടെ പ്രഥമ ഇടയനായ മാർ ജേക്കബ് അങ്ങാടിയത്തിന്റെ മെത്രാഭിഷേക ജൂബിലിയും ആഘോഷിക്കുന്നുവെന്നത് ഈ സമ്മേളനത്തിന്റെ പ്രത്യേക ആകർഷണമാണെന്നും അദ്ദേഹം ചൂണ്ടിക്കാട്ടി.

2026 ജൂലൈ 9 മുതൽ 12 വരെ ലോകപ്രശസ്തമായ ചിക്കാഗോ നഗരത്തിൽ, നഗരഹൃദയത്തിൽ സ്ഥിതി ചെയ്യുന്ന അതിപ്രശസ്തമായ മക്കോർമിക് പ്ലേസ് കൺവെൻഷൻ സെന്ററും അതിനോട് ചേർന്ന മൂന്ന് പ്രധാന ഹോട്ടലുകളും വേദിയാക്കി, ആയിരക്കണക്കിന് വിശ്വാസികളെ ഉൾക്കൊള്ളുന്ന രീതിയിൽ ഈ മഹാസംഗമം സംഘടിപ്പിക്കപ്പെടും. അത്യാധുനിക സൗകര്യങ്ങളോടുകൂടിയ ഈ വേദികൾ ആത്മീയവും സാംസ്കാരികവുമായ ഒരു അപൂർവ അനുഭവം വിശ്വാസികൾക്ക് സമ്മാനിക്കുമെന്ന് വിശ്വസിക്കുന്നതായി കൺവെൻഷൻ ഭാരവാഹികൾ പറയുകയുണ്ടായി.

രൂപതയിലെ വിവിധ ഇടവകകളിൽ കൺവെൻഷൻ ടീം നേരിട്ട് സന്ദർശനം നടത്തി രജിസ്ട്രേഷനും പരിപാടികളുമായി ബന്ധപ്പെട്ട വിശദമായ അവതരണങ്ങൾ നടത്തിയിരുന്നു.ഇത്തരം നേരിട്ടുള്ള സന്ദർശനങ്ങളും ആശയവിനിമയങ്ങളും ഇടവകകളിൽ വലിയ ഉത്സാഹവും പങ്കാളിത്ത മനോഭാവവും സൃഷ്ടിച്ചതായി രൂപതയിലെ ഇടവക വികാരിമാരും പ്രതിനിധികളും അഭിപ്രായപ്പെട്ടിരുന്നു.

വിശ്വാസ സംരക്ഷണത്തിനും ആത്മീയ വളർച്ചയ്ക്കും സഭാ ഐക്യത്തിനും സൗഹൃദ കൂട്ടായ്മകൾക്കും ഊന്നൽ നൽകി കൺവെൻഷൻ പരിപാടികൾ രൂപകൽപ്പന ചെയ്തിരിക്കുന്നു. ദിവസേനയുള്ള ദിവ്യബലി, ആരാധനകൾ, ധ്യാനങ്ങൾ എന്നിവയ്‌ക്കൊപ്പം വൈവിധ്യമാർന്ന വിഷയാവതരണങ്ങൾ, സംഘടനാ സംഗമങ്ങൾ, കുടുംബ സെഷനുകൾ, യുവജന സമ്മേളനങ്ങൾ, കലാപരിപാടികൾ, മത്സരങ്ങൾ എന്നിവയും ഉൾപ്പെടുത്തിയിട്ടുണ്ട്. കുട്ടികൾക്കും യുവജനങ്ങൾക്കും മുതിർന്നവർക്കും പ്രത്യേകം ട്രാക്കുകളിലായി പരിപാടികൾ ഒരുക്കിയിരിക്കുന്നതും ഈ കൺവെൻഷന്റെ മറ്റൊരു സവിശേഷതയാണ്.

അമേരിക്കയിലെ സീറോ മലബാർ വിശ്വാസികളുടെ ഏറ്റവും വലിയ ആത്മീയ–സാംസ്കാരിക സംഗമമായ ഈ സിൽവർ ജൂബിലി കൺവെൻഷനിൽ പങ്കാളികളാകുവാൻ ഏവരെയും കൺവെൻഷൻ ടീം ഹൃദയപൂർവ്വം ക്ഷണിച്ചു.സിയാറ്റിൽ ദേവാലയത്തിലെ വികാരിയച്ചൻ്റെയും ഇടവകാംഗങ്ങളുടെയും സ്നേഹപൂർവ്വമായ സ്വീകരണത്തിനും സമഗ്ര സഹകരണത്തിനും കൺവെൻഷൻ ടീം പ്രത്യേക നന്ദി രേഖപ്പെടുത്തി.

കൺവൻഷൻ്റെ വിവരങ്ങൾക്കും രജിസ്ട്രേഷനുമായി
www. Syroconvention.org സന്ദർശിക്കാവുന്നതാണ്.