അമേരിക്കൻ തലസ്ഥാനമായ വാഷിംഗ്ടൺ ഡിസിയുടെ മേയർ തിരഞ്ഞെടുപ്പിൽ ആദ്യ ദക്ഷിണേഷ്യൻ സ്ഥാനാർത്ഥിയായി തമിഴ്നാട് സ്വദേശിനി റിനി സമ്പത്ത്. ഡെമോക്രാറ്റിക് പാർട്ടിയെ പ്രതിനിധീകരിച്ചാണ് 31-കാരിയായ റിനി ജനവിധി തേടുന്നത്. അമേരിക്കൻ തലസ്ഥാന നഗരിയുടെ മേയർ സ്ഥാനത്തേക്ക് മത്സരിക്കുന്ന ആദ്യ ദക്ഷിണേഷ്യൻ സ്ഥാനാർത്ഥി എന്ന സവിശേഷതയോടെ ചരിത്രം തിരുത്തികുറിച്ചുകൊണ്ടാണ് റിനി രാഷ്ട്രീയ രംഗത്തിറങ്ങുന്നത്.
ആരാണ് റിനി സമ്പത്ത്
തമിഴ്നാട്ടിലെ തേനിയിൽ ജനിച്ച റിനി, ഏഴ് വയസിലാണ് അമേരിക്കയിലേക്ക് കുടിയേറിയത്. തുടർന്ന് ബാല്യവും കൗമാരവും അവിടെയായിരുന്നു. സൗത്ത് കാലിഫോർണിയ സർവകലാശാലയിലായിരുന്നു ബിരുദം പൂർത്തിയാക്കിയത് (International relations and security studies). അമേരിക്കൻ സർക്കാർ ഏജൻസികൾക്ക് സേവനം നൽകുന്ന പ്രമുഖ കൺസൾട്ടിംഗ് സ്ഥാപനമായ ബൂസ് ആലൻ ഹാമിൽട്ടണിൽ സീനിയർ കൺസൾട്ടന്റായി പ്രവർത്തിച്ചു. നിലവിൽ വാഷിംഗ്ടൺ ഡി.സിയിൽ ആസ്ഥാനമായി പ്രവർത്തിക്കുന്ന ‘താരോസ്’ എന്ന സ്ഥാപനത്തിന്റെ ഡയറക്ടറാണ്.

റിനി സമ്പത്തിന്റെ തിരഞ്ഞെടുപ്പ് വാ​ഗ്​ദാനങ്ങൾ

നഗരത്തിലെ അടിസ്ഥാന സൗകര്യങ്ങൾ മെച്ചപ്പെടുത്തുക എന്നതാണ് റിനിയുടെ പ്രധാനലക്ഷ്യം. ഇക്കാര്യം പലതവണ റിനി പ്രഖ്യാപിക്കുകയും ചെയ്തിട്ടുണ്ട്. മേയറായാൽ അടിസ്ഥാന സൗകര്യങ്ങൾ ഉറപ്പാക്കുക തന്നെയായിരിക്കും മുൻഗണനയെന്ന് റിനി വ്യക്തമാക്കി. റോഡിലെ കുഴികൾ നികത്തൽ, നദികളിലേക്ക് ഒഴുകുന്ന മലിനജലം തടയുക, വിലക്കയറ്റം നിയന്ത്രിക്കുക തുടങ്ങിയവയാണ് മറ്റ് വാ​​ഗ്ദാനങ്ങൾ.