ഇന്ധ്യാക്കാരെ സംബന്ധിച്ചിടത്തോളം  പൊതുവെ റ്റിപ് കൊടുക്കുന്ന ഏർപ്പാടിനോട് അത്ര താല്പര്യമുള്ള കാര്യമായിരുന്നില്ല. കാരണം അത് അവിടുത്തെ ഒരു പതിവായിരുന്നില്ല. എന്നാൽ വിദേശങ്ങളിൽ, റ്റിപ് സർവസാധാരണമാണ് . മിക്കവാറും ഏല്ലാ സേവനരംഗത്തും - റെസ്റ്റോറന്റുകളിലും കൊറിയർ സർവീസിലും, വാലേ പാർക്കിങ്ങിലും കസീനോകളിലും എല്ലാം തന്നെ.സേവനം ലഭിക്കുന്നവർ സന്തോഷത്തോടെ കൊടുക്കുന്ന സംഭാവന, പക്ഷേ ഇന്ന് ഇത്ര % എന്ന് തിട്ടപ്പെടുത്തി ആവശ്യപ്പെടുന്ന തരത്തിലെത്തി നിൽക്കുന്നു. റെസ്റ്റോറന്റുകളിലും കസീനോകളിലും ജോലി ചെയ്‌യുന്നവർ ജോലി കഴിഞ്ഞു പോകുമ്പോൾ, റബ്ബർബാൻഡിട്ട് കയ്യിൽ പിടിച്ചുകൊണ്ട് പോകുന്നത്, അവരുടെ മിനിമം വേതനത്തിന്റെ എത്രയോ ഇരട്ടിയാണെന്നു സങ്കല്പിച്ചാൽ മാത്രം മതി!

പ്രത്യേകിച്ചും അമേരിയ്ക്കയിൽ ദശലക്ഷക്കണക്കിന് തൊഴിലാളികൾക്ക് ടിപ്പുകൾ വെറുമൊരു ആനുകൂല്യമല്ല, അവർക്ക് ആ വരുമാനം അത്യാവശ്യമാണ്. അങ്ങനെ ലഭിക്കുന്ന വരുമാനം പലപ്പോഴും കണക്കിൽ കാണിക്കാറുമില്ലായിരുന്നു. യുണൈറ്റഡ് സ്റ്റേറ്റ്സിലെ ഏകദേശം 4 ദശലക്ഷം ആളുകൾ, അല്ലെങ്കിൽ ഓരോ നാൽപ്പത് തൊഴിലാളികളിൽ ഒരാൾ, വാടക നൽകാനും ഭക്ഷണം കിട്ടാനും  ടിപ്പുകളെ ആശ്രയിക്കുന്നുവെന്ന് കണക്കുകൾ വ്യക്തമാക്കുന്നു. എന്നിരുന്നാലും, IRS സാധാരണയായി ആ പണത്തിന് നികുതി ചുമത്തുന്നു. ടിപ്പുകൾ നിങ്ങളുടെ ശമ്പളത്തിന്റെ ഭാഗമാണെങ്കിൽ, നിങ്ങൾക്ക് ലഭിക്കുന്ന ഓരോ ഡോളറും, മേശപ്പുറത്ത് പണമായി വച്ചാലും ക്രെഡിറ്റ് കാർഡ് രസീതിൽ ചേർത്താലും, ഫെഡറൽ ടാക്സ് ഏജൻസി സാധാരണ വരുമാനമായി കണക്കാക്കുന്നു.

എന്നാൽ 2025 ജൂലൈ 4 ന് പ്രസിഡന്റ് ട്രംപ് "വൺ ബിഗ് ബ്യൂട്ടിഫുൾ ബിൽ" (OBBB) എന്നറിയപ്പെടുന്ന ബില്ലിൽ ഒപ്പുവച്ചതിനെത്തുടർന്ന് പല തൊഴിലാളികളുടെയും കാര്യത്തിൽ ഇപ്പോൾ അത് മാറിയിരിക്കുന്നു."നോ ടാക്സ് ഓൺ ടിപ്സ് ആക്റ്റ്" എന്നറിയപ്പെടുന്ന ഒരു ബിൽ ഒബിബിബിയിൽ ഉൾപ്പെടുത്തിയിട്ടുണ്ട്. മുമ്പ് ,മേയിൽ "ടിപ്പുകൾക്ക് നികുതിയില്ല എന്ന നിയമം" ടെക്സസിലെ റിപ്പബ്ലിക്കൻ സെനറ്റർ ടെഡ് ക്രൂസ് സ്പോൺസർ ചെയ്തത്  യുഎസ് സെനറ്റ് 100-0 ഉഭയകക്ഷി വോട്ടിന് പാസാക്കിയിരുന്നു. റിപ്പബ്ലിക്കൻ നിയമനിർമ്മാതാക്കൾ അവരുടെ മെഗാ അനുരഞ്ജന ബില്ലിൽ ഈ നടപടി ഉൾപ്പെടുത്തിയിട്ടുണ്ട്, ഇപ്പോൾ അത് നിയമമാണ്.

ഇതിനർത്ഥം ദശലക്ഷക്കണക്കിന് ടിപ്പ് ലഭിച്ച തൊഴിലാളികൾക്ക് അവർ സമ്പാദിക്കുന്നതിന്റെ കൂടുതൽ തുക താൽക്കാലികമായി നികുതിയില്ലാതെ സമ്പാദ്യമായി മാറും. നിയമപ്രകാരം, നിങ്ങളുടെ എല്ലാ ടിപ്പുകളും ഒരു മാസത്തിനുള്ളിൽ $20 അല്ലെങ്കിൽ അതിൽ കൂടുതൽ ലഭിക്കുകയാണെങ്കിൽ, നിങ്ങളുടെ തൊഴിലുടമയെ അറിയിക്കണം. നിങ്ങളുടെ തൊഴിലുടമ നിങ്ങളുടെ ശമ്പള കണക്കുകൂട്ടലുകളിൽ ആ ടിപ്പുകൾ ഉൾപ്പെടുത്തുന്നു, 

സാധാരണ  മണിക്കൂർ വേതനത്തിന് അവർ ചെയ്യുന്നതുപോലെ.ഫെഡറൽ ഇൻകം ടാക്സ്, സോഷ്യൽ സെക്യൂരിറ്റി ടാക്സ്, മെഡികെയർ നികുതികൾ എന്നിവ അതിൽനിന്നും കട്ട് ചെയ്യുകയും ചെയ്യുമായിരുന്നു.നിങ്ങൾ നികുതി റിട്ടേൺ ഫയൽ ചെയ്യുമ്പോൾ, നിങ്ങളുടെ റിപ്പോർട്ട് ചെയ്ത ടിപ്പുകൾ നിങ്ങളുടെ W-2-ൽ ഉൾപ്പെടുത്തുകയും നിങ്ങളുടെ മറ്റ് വരുമാനത്തിലേക്ക് ചേർക്കുകയും ചെയ്യും, അത് നിങ്ങൾക്ക് എത്ര നികുതി കൊടുക്കണമെന്ന്  നിർണ്ണയിക്കും. നിങ്ങൾക്ക് പണമായി റ്റിപ്  ലഭിച്ചാലും നിങ്ങൾ ഒരു റെക്കോർഡ് സൂക്ഷിക്കുകയും അത് റിപ്പോർട്ട് ചെയ്യുകയും ചെയ്യുമെന്ന് IRS പ്രതീക്ഷിക്കുന്നു.

വൺ ബിഗ് ബ്യൂട്ടിഫുൾ ബിൽ ആക്ട്, ചില സർവീസ് റോളുകളിലുള്ളവർക്ക് ആദ്യത്തെ $25,000 ടിപ്പുകൾക്ക് ഒരു പരിധിയില്ലാത്ത കിഴിവ് നൽകുന്നു. ബിസിനസുകൾക്കും നികുതിദായകർക്കും വേണ്ടിയുള്ള നിയന്ത്രണങ്ങൾ അപ്‌ഡേറ്റ് ചെയ്യാൻ യുഎസ് ട്രഷറി വകുപ്പും IRS-ഉം പ്രവർത്തിക്കുമ്പോൾ, ആർക്കാണ് യോഗ്യത നേടാനാകുക എന്നതിനെക്കുറിച്ചുള്ള രൂപ രേഖയും നൽകിയിട്ടുണ്ട് .
"കിഴിവിന്റെ ആവശ്യങ്ങൾക്കായി ഒരു 'എലിജിബിൾ ടിപ്പ്' ആകുന്നതിന്, തുക സ്വമേധയാ നൽകുകയും പണമടയ്ക്കുന്നയാൾ നിർണ്ണയിക്കുകയും ചെയ്യുന്നതുൾപ്പെടെ ചില ചട്ടങ്ങൾ  പാലിക്കണം,". ഉദാഹരണത്തിന്, ഒരു റെസ്റ്റോറന്റ് ഒരു നിശ്ചിത വലുപ്പത്തിൽ കൂടുതലുള്ള പാർട്ടികൾക്ക് ബില്ലിൽ നിർബന്ധിത ഗ്രാറ്റുവിറ്റി ചേർക്കുന്നിടത്ത് കിഴിവ് ബാധകമാകില്ല."

നിങ്ങൾ ഗ്രീൻ കാർഡു ഹോൾഡറോ  യുഎസ് പൗരനോ ആണെങ്കിൽ  നിങ്ങൾ ഇന്ത്യയിലെ തുക വരുമാനമായി കാണിച്ച് നികുതി അടയ്ക്കണം. നിങ്ങൾ H1B അല്ലെങ്കിൽ മറ്റ് താൽക്കാലിക വിസകളിലാണെങ്കിൽ നിയമം അവ്യക്തമാണ്, നിങ്ങളുടെ ഇന്ത്യയിലെ വരുമാനം വെളിപ്പെടുത്താതെ തന്നെ നിങ്ങൾക്ക് തൽക്കാലം രക്ഷപ്പെടാം എന്ന് വിചാരിക്കുന്നു.

15-20% ഒരു സാധാരണ ടിപ്പായി കണക്കാക്കപ്പെടുന്നുവെന്ന് പൊതുവേ പറയുന്നു, എന്നാൽ സത്യസന്ധമായി പറഞ്ഞാൽ 20% ൽ താഴെയുള്ള ഏത് തുകയും മോശം ടിപ്പായി കണക്കാക്കപ്പെടുന്നു.ഒരു സേവനത്തിൽ, കൂടുതൽ വൈദഗ്ധ്യവും അനുഭവപരിചയവും ലഭിക്കുന്തോറും നിങ്ങൾ ടിപ്പ് നൽകുന്നതിനെക്കുറിച്ച് കൂടുതൽ ശ്രദ്ധാലുവായിരിക്കണം. നിങ്ങളുടെ മുൻഗണനകൾ അറിയാവുന്ന, നിങ്ങൾക്ക് വ്യക്തിപരമായ ബന്ധമുള്ള ഒരാൾക്ക് കൂടുതൽ ടിപ്പ് ലഭിച്ചേക്കാം, കാരണം അവർക്ക് അറിവുള്ള ഉപദേശവും ഉയർന്ന നിലവാരമുള്ള സേവനങ്ങളും നൽകാൻ കഴിയും.

"മുഖസ്തുതി നല്ലതാണ്, പക്ഷേ ടിപ്പ് തത്കാലം മതിയാകും".

ഡോ. മാത്യു ജോയിസ്, ലാസ്‌ വേഗാസ്