ചിക്കാഗോ: വരാനിരിക്കുന്ന കെ.സി.സി.എൻ.എ കൺവെൻഷനിലെ ഘോഷയാത്രയിൽ ചിക്കാഗോ കെസിഎസിൻ്റെ അഭിമാനവും പാരമ്പര്യവും മികച്ച രീതിയിൽ അവതരിപ്പിക്കുന്നതിനായി കഴിവും നേതൃത്വമികവും തെളിയിച്ച ഒരു ശക്തമായ സംഘത്തെ തെരഞ്ഞെടുത്തു.

വിവിധ വിമൻസ് ഫോറം റീജിയണുകളിൽ ഏറ്റെടുത്ത ഉത്തരവാദിത്വങ്ങൾ അതീവ കാര്യക്ഷമതയോടെയും സംഘാടന മികവോടെയും വിജയകരമായി പൂർത്തിയാക്കിയ മാർഗരറ്റ് പാട്ടകണ്ടത്തിൽ, കൂടാതെ സെന്റ് ആന്റണീസ് കൂടാരയോഗത്തിന്റെ ക്രിസ്മസ് കരോൾ പരിപാടിയെ മികച്ച രീതിയിൽ ഏകോപിപ്പിച്ച് സമൂഹത്തിൽ ശ്രദ്ധേയനായ നവീൻ കണിയാപറമ്പിൽ എന്നിവരാണ് ഈ വർഷത്തെ കെ.സി.സി.എൻ.എ കൺവെൻഷനിൽ കെ.സി.എസ്. ചിക്കാഗോയുടെ ഘോഷയാത്രയ്ക്ക് നേതൃത്വം നൽകുന്നത്.

ഇവരുടെ നേതൃത്വത്തിന് കൂടുതൽ കരുത്തേകുന്നതിനായി പ്രവർത്തനരംഗത്ത് സജീവ സാന്നിധ്യമായ മഞ്ജു കൊല്ലപ്പള്ളിൽ, ബിനി ചാലുങ്കൽ, കൂടാതെ യുവജനങ്ങളുടെ പ്രിയങ്കരനായി മാറിക്കൊണ്ടിരിക്കുന്ന ടോണി പോങ്ങാന എന്നിവരും സംഘത്തോടൊപ്പം ചേരുന്നു. ഈ കൂട്ടായ്മയുടെ നേതൃത്വത്തിൽ ചിക്കാഗോയുടെ ഘോഷയാത്ര ഈ വർഷം ശ്രദ്ധേയമായ പ്രകടനം കാഴ്ചവെക്കുമെന്ന ആത്മവിശ്വാസമാണ് സമൂഹാംഗങ്ങൾ പങ്കുവയ്ക്കുന്നത്.

പ്രോസഷൻ കമ്മിറ്റിയുടെ എല്ലാ പ്രവർത്തനങ്ങളും സൂക്ഷ്മമായി നിരീക്ഷിക്കുകയും ആവശ്യമായ നിർദേശങ്ങളും പിന്തുണയും നൽകുകയും ചെയ്യുന്നതിനായി വിമൻസ് ഫോറം ഭാരവാഹികളായ ഷാനിൽ വെട്ടിക്കാട്ട് (President), ജിനു നെടിയകാലായിൽ (Vice President), മന്നൂ തിരുനെല്ലിപ്പറമ്പിൽ (Secretary), ജെയിൻ മുണ്ടപ്ലാക്കിൽ (Joint Secretary), ഡെന്നി തുരുത്തുവേലിൽ (Treasurer) എന്നിവർ സജീവമായി പ്രവർത്തിച്ചുവരുന്നു.

കെ.സി.സി.എൻ.എ കൺവെൻഷൻ ഘോഷയാത്രയിൽ ചിക്കാഗോ കെ.സി.എസ്. മികച്ച പ്രകടനം കാഴ്ചവെച്ച് ഒന്നാം സ്ഥാനം കരസ്ഥമാക്കട്ടെയെന്ന് ആശംസിച്ച്, കെ.സി.എസ്. പ്രസിഡന്റ് ജോസ് ആനമല പ്രോസഷൻ ടീമിനെ അഭിനന്ദിച്ചു. സമൂഹത്തിന്റെ ഐക്യവും സാംസ്കാരിക പൈതൃകവും പ്രതിഫലിപ്പിക്കുന്ന ഈ ഘോഷയാത്ര കൺവെൻഷനിലെ ഏറ്റവും ശ്രദ്ധേയമായ അവതരണങ്ങളിലൊന്നായി മാറുമെന്ന പ്രതീക്ഷയിലാണ് ചിക്കാഗോ കെ.സി.എസ്. കുടുംബം.