ന്യൂയോർക്ക്: ഈ വാരാന്ത്യത്തിൽ സുവർണ്ണ ജൂബിലി(50-ാം വാർഷികം) ആഘോഷിക്കുന്ന ഇന്ത്യൻ ക്നാനായ കത്തോലിക്കാ കമ്മ്യൂണിറ്റി, ന്യൂയോർക്ക്നു (IKCC NY) ഡല്ലാസ്–ഫോർട്ട് വർത്ത് ക്നാനായ കത്തോലിക്കാ അസോസിയേഷൻറെ(KCADFW) ഹൃദയം നിറഞ്ഞ ആശംസകൾ അറിയിച്ചു.

ഇന്ത്യയ്ക്ക് പുറത്തായി രൂപീകരിക്കപ്പെട്ട ആദ്യ ക്നാനായ കത്തോലിക്കാ സംഘടനയായ IKCC NY, ക്നാനായ സമൂഹത്തിന്റെ ചരിത്രത്തിലും ഹൃദയത്തിലും അതുല്യമായ സ്ഥാനമാണ് കൈവരിച്ചിരിക്കുന്നത്. ഉത്തര അമേരിക്കയിൽ ക്നാനായ സമൂഹത്തിന്റെ ഉറച്ച അടിത്തറ പാകിയതോടൊപ്പം KCCNAയുടെ രൂപീകരണത്തിലും ഈ സംഘടന നിർണായക പങ്കുവഹിച്ചു. പൂർവ്വിക നേതാക്കളുടെ ദീർഘവീക്ഷണം , സമർപ്പണം,സമുദായ സ്നേഹം എന്നിവയാണ് തുടർന്ന് വന്ന എല്ലാ ക്നാനായ സംഘടനകൾക്കും വഴികാട്ടിയായത്.

ദശകങ്ങളായി IKCC NYയുടെ നേതാക്കൾ ഉത്തര അമേരിക്കയിലുടനീളം ക്നാനായ സമൂഹങ്ങൾക്ക് പ്രചോദനമായും മാർഗ്ഗദർശികളായും പ്രവർത്തിച്ചു വരുന്നു. നമ്മുടെ ഐഡന്റിറ്റി, പാരമ്പര്യം, ഐക്യം എന്നിവ സംരക്ഷിക്കുന്നതിൽ അവർ കാണിച്ച പ്രതിബദ്ധത സമൂഹത്തിന്റെ വളർച്ചക്കും ഐക്യത്തിനും വലിയ സംഭാവനയായി മാറിയിട്ടുണ്ട്.

ഡാളസ് ഫോർട്ട് വർത്ത് ക്നാനായ സമൂഹത്തിൽ ഇന്ന് സജീവമായി പ്രവർത്തിക്കുന്ന നിരവധി കുടുംബങ്ങൾ IKCC NYയിൽ നിന്നാണ് ഇവിടെ എത്തിച്ചേർന്നത് എന്നത് പ്രത്യേകമായ നന്ദിയോടെയാണ് ഓർക്കുന്നത്. പ്രത്യേകിച്ച് പരേതനായ ലൂക്കോസ് അലഞ്ചേരിൽ (സെക്രട്ടറി: 1976–78, പ്രസിഡന്റ്: 1981–82), ഗ്രേസി മാക്കിൽ (വൈസ് പ്രസിഡന്റ്: 1980–81), അലിയമ്മ അലഞ്ചേരിൽ (വൈസ് പ്രസിഡന്റ്: 1984), ഡോ. സ്റ്റീഫൻ പോട്ടൂർ (എക്സിക്യൂട്ടീവ് കമ്മിറ്റി അംഗം: 1998) എന്നിവരുടെ സംഭാവനകൾ ഈ അവസരത്തിൽ ആദരപൂർവ്വം സ്മരിക്കുന്നു.

സ്വർണ ജൂബിലി ആഘോഷിക്കുന്ന ഈ വേളയിൽ IKCC NYയുടെ അതുല്യമായ യാത്രയ്ക്കും, ത്യാഗങ്ങൾക്കും, നേട്ടങ്ങൾക്കും, ക്നാനായ കത്തോലിക്കാ പാരമ്പര്യത്തിനോടുള്ള ഉറച്ച പ്രതിബദ്ധതയ്ക്കും ദൈവത്തോട് നന്ദി അർപ്പിക്കുന്നു. സമൂഹം ഇന്ന് നേരിടുന്ന വിവിധ വെല്ലുവിളികളിൽ IKCC NYയുടെ മാതൃക ക്നാനായ സമൂഹത്തിന് ശക്തിയുടെയും പ്രത്യാശയുടെയും പ്രചോദനമായി തുടരുന്നു.

ഈ സ്വർണ ജൂബിലി വർഷം സന്തോഷത്തോടും അനുഗ്രഹത്തോടും ഐക്യത്തോടും കൂടിയതാകട്ടെ. വരാനിരിക്കുന്ന വർഷങ്ങൾ ഇതിലും കൂടുതൽ പ്രകാശമാനമാകട്ടെ എന്ന് ആശംസിക്കുന്നുവെന്നു കെ.സി.എ.ഡി.എഫ്‌.ഡബ്ല്യു എക്സിക്യൂട്ടീവ് കമ്മിറ്റിക്കുവേണ്ടി പ്രസിഡന്റ് ബൈജു ആലപ്പാട്ട് ഐ.കെ.സി.സി. ന്യൂയോർക്ക് പ്രസിഡന്റ് സ്റ്റീഫൻ കിടാരത്തിലിനയച്ച ആശംസ സന്ദേശത്തിൽ അറിയിച്ചു.