ആര്എസ് എസ് ശതാബ്ദി സമ്മേളനത്തില് ആശംസയുമായി സിപിഎം ബ്രാഞ്ച് കമ്മറ്റി അംഗവും യാക്കോബായ പള്ളി വികാരിയുമായ വൈദികന്. കൂത്താട്ടുകുളം വടകര സെന്റ് ജോണ്സ് മുത്തപ്പന് യാക്കോബായ ഇടവക വികാരി ഫാദര് പോള് തോമസ് പീച്ചിയിലാണ് ആര്എസ്എസ് വേദിയിലെത്തിയത്. ആര്എസ്എസ് കൂത്താട്ടുകുളം മണ്ഡലം സംഘടിപ്പിച്ച യോഗത്തിലാണ് വൈദികന് അധ്യക്ഷനായി തന്നെ പങ്കെടുത്തത്.
പല നിറമാണെങ്കിലും രാജ്യത്തിന്റെ വിജയത്തിനായി ഒന്നിക്കണമെന്ന് ഫാദര്പോള് തോമസ് പീച്ചിയില് ഹൈസ്കൂള് മൈതാനത്തു നടന്ന യോഗത്തില് പറഞ്ഞു. ഗണഗീതം ആലപിച്ച് അദ്ദേഹം പ്രസംഗം കൊഴുപ്പിക്കുകയും ചെയ്തു. ആര്എസ്എസ് നടത്തുന്ന സാമൂഹ്യ ഇടപെടലും അവരുടെ അടുക്കും ചിട്ടയും ശ്ലാഘനീയമാണ്. സേവാഭാരതിയുടെ പ്രവര്ത്തനങ്ങള് തികച്ചും മനുഷ്യത്വപരമാണ്. ആചാരപ്രകാരം ഏത് കാര്യത്തിനും വിജയദശമി നല്ല ദിവസമാണെന്നും അദ്ദേഹം പറഞ്ഞു.
സിപിഎം ഉപ്പുകണ്ടം ബ്രാഞ്ച് അംഗമാണ്. ഫാദര് പോള് തോമസ്. എല്ലാ സിപിഎം പരിപാടികളിലെ സ്ഥിരം സാന്നിധ്യവും. സഭാ തര്ക്കവേളയില് യാക്കോബായ സഭാ വിഭാഗത്തിനു വേണ്ടിയുള്ള പോരാട്ടങ്ങളിലെ മുന്നിര പോരാളിയായിരുന്നു ഇദ്ദേഹം. ആര്എസ്എസ് പരിപാടില് പങ്കെടുത്തതുമായി ബന്ധപ്പെട്ട കാര്യങ്ങള് ചോദിക്കാന് ഫാദര് പോള് തോമസിനെ ബന്ധപ്പെടാന് ശ്രമിച്ചെങ്കിലും അദ്ദേഹം കോള് എടുക്കാന് തയാറായില്ല.
