തൃശൂർ: കുന്നംകുളത്ത് വീടിനു മുന്നിൽ നിർത്തിയിട്ടിരുന്ന ഓട്ടോറിക്ഷ കിണറ്റിലേക്ക് മറിഞ്ഞ് അപകടം. അപകടത്തിൽ നാലുവയസുകാരി അത്ഭുതകരമായി രക്ഷപ്പെട്ടു. അമ്പലംപള്ളി സ്വദേശിയായ കുട്ടിയാണ് അപകടത്തിൽപ്പെട്ടത്. ഇന്ന് ഉച്ചയ്ക്ക് രണ്ടരയോടെയാണ് സംഭവം. വീട്ടുമുറ്റത്ത് മുത്തച്ഛൻ നിർത്തിയിട്ടിരുന്ന ഇലക്ട്രിക് ഓട്ടോറിക്ഷയിൽ കുട്ടി കയറി കളിക്കുകയായിരുന്നു. അബദ്ധത്തിൽ കുട്ടി ചാവി തിരിക്കുകയും ആക്‌സിലറേറ്ററിൽ അമർത്തുകയും ചെയ്തതോടെ ഓട്ടോ മുന്നോട്ട് കുതിച്ചു.

ഇലക്ട്രിക് വാഹനമായതിനാൽ ശബ്ദം പുറത്തുവരാതിരുന്നത് വീട്ടുകാരുടെ ശ്രദ്ധയിൽ പെട്ടില്ല. നിയന്ത്രണം വിട്ട ഓട്ടോ കിണറിന്റെ ചുറ്റുമതിൽ തകർത്ത് കിണറ്റിലേക്ക് വീഴുകയായിരുന്നു. ഭാഗ്യവശാൽ ഓട്ടോ കിണറിന്റെ വശത്ത് തങ്ങിനിന്നു. ശബ്ദം കേട്ടെത്തിയ അയൽവാസിയും നാട്ടുകാരും ഉടൻ തന്നെ കിണറ്റിലിറങ്ങി കുട്ടിയെ സുരക്ഷിതമായി പുറത്തെടുത്തു. നിസ്സാര പരിക്കുകൾ മാത്രമുള്ള കുട്ടിയെ ഉടൻ തന്നെ ആശുപത്രിയിൽ പ്രവേശിപ്പിച്ചു. നിലവിൽ കുട്ടിയുടെ ആരോഗ്യനില തൃപ്തികരമാണ്. ഓട്ടോറിക്ഷ കിണറ്റിൽ നിന്ന് പുറത്തെടുക്കാനുള്ള നടപടികൾ തുടരുകയാണ്.