Kerala Express

തിരുവനന്തപുരം: സ്കൂളുകളില്‍ ഒന്നു മുതല്‍ 12 വരെ ക്ലാസുകള്‍ക്ക് ഏകീകൃത ഭരണസംവിധാനം നടപ്പാക്കുമെന്നു മുഖ്യമന്ത്രി പിണറായി വിജയന്‍. ഇതനുസരിച്ചു സ്കൂളിന്‍റെ മേധാവി പ്രിന്‍സിപ്പലായിരിക്കുമെന്നും അധ്യാപക സംഘടനാ നേതാക്കളുടെ യോഗത്തില്‍ മുഖ്യമന്ത്രി പറഞ്ഞു. കോളജുകളില്‍നിന്ന് പ്രീഡിഗ്രി വേര്‍പെടുത്തിയത് അതിനെ സ്കൂള്‍ വിദ്യാഭ്യാസത്തിന്‍റെ ഭാഗമാക്കാനായിരുന്നു. താല്‍ക്കാലിക സംവിധാനം എന്ന നിലയിലായിരുന്നു ഹയര്‍ സെക്കന്‍ഡറി ഡയറക്ടറേറ്റ് രൂപീകരിച്ചത്. ഒന്നു മുതല്‍ 12 വരെ ഒറ്റ സംവിധാനമായി പ്രവര്‍ത്തിക്കണം. ഒരു സ്ഥാപനത്തില്‍ രണ്ടു മേധാവികള്‍ ഗുണകരമല്ല. സ്കൂളിന്‍റെ മേധാവി പ്രിന്‍സിപ്പലാകുന്നതോടെ അവരെ സഹായിക്കാന്‍ ജീവനക്കാരില്ലാത്ത അവസ്ഥയ്ക്കും പരിഹാരമാകും. എയ്ഡഡ് സ്കൂളുകള്‍ക്കു ഗവണ്‍മെന്‍റ് എയ്ഡഡ് സ്കൂള്‍ എന്ന പേര് നല്‍കണമെന്ന അധ്യാപകരുടെ നിര്‍ദ്ദേശം പരിഗണിക്കും. അക്കാദമിക് കാര്യങ്ങളില്‍ എയ്ഡഡ് മേഖലയെ മാറ്റിനിര്‍ത്തില്ല. എയ്ഡഡ് മാനേജര്‍മാര്‍ക്കു ശിക്ഷിക്കാനുള്ള അധികാരം പിന്‍വലിക്കണമെന്ന് അധ്യാപക സംഘടനകള്‍ ആവശ്യപ്പെട്ടു. ഇതു നടപ്പാക്കാനുള്ള പ്രയാസം വിശദീകരിച്ചു മുഖ്യമന്ത്രി അതു പരിശോധിക്കുമെന്നു പറഞ്ഞു.

Sponsored Advertisments