Kerala Express

കോട്ടയം: ഭൗതികശാസ്ത്രത്തിലെ അതുല്യ പ്രതിഭയും മലയാളിയുമായ ഇ.സി.ജി. സുദര്‍ശന്‍ (86) അന്തരിച്ചു. അമേരിക്കയിലെ ടെക്സസിലായിരുന്നു അന്ത്യം. ഒമ്പതു തവണ ഭൗതിക നൊബേല്‍ സമ്മാനത്തിനു പരിഗണിക്കപ്പെട്ടുവെങ്കിലും സമ്മാനം ലഭിച്ചില്ല. പ്രകാശത്തേക്കാള്‍ വേഗത്തില്‍ സഞ്ചരിക്കുന്ന ടാക്കിയോണ്‍ കണികകളെ സംബന്ധിച്ച പരികല്പനകളാണു ഭൗതികശ്രദ്ധ നേടിയെടുത്തത്. ക്വാണ്ടം വ്യൂഹങ്ങളെ തുടര്‍ച്ചയായി നിരീക്ഷിച്ചാല്‍ എന്തു സംഭവിക്കും എന്ന കാര്യം പരിഗണിക്കുന്ന ക്വാണ്ടം സീറോ ഇഫക്ട് സുദര്‍ശന്‍റെ സുപ്രധാന സംഭാവനയാണ്. ക്വാണ്ടം ഒപ്റ്റിക്സായിരുന്നു സുദര്‍ശന്‍റെ ഇഷ്ടമേഖല. അദ്ദേഹത്തിന്‍റെ ഏറ്റവും പ്രശസ്തമായ പഠന നിരീക്ഷണങ്ങളും ഈ മേഖലയിലായിരുന്നു. 2007ല്‍ പദ്മവിഭൂഷണ്‍ നല്‍കി രാജ്യം ഡോ. സുദര്‍ശനെ ആദരിച്ചു. കോട്ടയം ജില്ലയിലെ പള്ളത്ത് 1931 സെപ്റ്റംബര്‍ 16നാണ് അദ്ദേഹം ജനിച്ചത്. പിതാവ് എണ്ണയ്ക്കല്‍ തറവാട്ടില്‍ ഇ.ഐ. ചാണ്ടി റവന്യൂ സൂപ്പര്‍വൈസറും മാതാവ് അച്ചാമ്മ അധ്യാപികയുമായിരുന്നു. തമിഴ്നാട് സ്വദേശിനി ഭാമതിയാണു ഭാര്യ. അലക്സാണ്ടര്‍, പരേതനായ അരവിന്ദ്, അശോക് എന്നിവര്‍ മക്കളാണ്.

Sponsored Advertisments