Kerala Express

×

Warning

JFolder::create: Could not create folder.Path: /var/www/html/keralaexpressDScacheDStpl-kerala_express

തിരുവനന്തപുരം: ശബരിമലയിലെ സ്ത്രീപ്രവേശന വിഷയത്തില്‍ ദേവസ്വം ബോര്‍ഡ് വിളിച്ച ചര്‍ച്ച പരാജയപ്പെട്ടതിനു പിന്നാലെ, നിലയ്ക്കലില്‍ സംഘര്‍ഷവും അറസ്റ്റും. യുവതീപ്രവേശനത്തിനെതിരെ ശരണമന്ത്ര കൂട്ടായ്മ നടത്തിയ പ്രതിഷേധത്തില്‍ പങ്കെടുത്ത എട്ടുപേരെയാണ് പോലീസ് അറസ്റ്റ് ചെയ്തത്. സമരപ്പന്തലിനുള്ളില്‍ നിന്ന് ബലപ്രയോഗത്തിലൂടെയായിരുന്നു അറസ്റ്റ്. ഇവരെ പോലീസ് വാഹനത്തിലേക്ക് മാറ്റുന്നത് കൂടെയുള്ള വിശ്വാസികള്‍ തടയാന്‍ ശ്രമിച്ചത് സംഘര്‍ഷമുണ്ടാക്കി. വാഹനങ്ങള്‍ തടയുകയും റോഡില്‍ മദ്യപിച്ച് ബഹളമുണ്ടാക്കി കൂട്ടായ്മയിലേക്കു നുഴഞ്ഞു കയറുകയും ചെയ്തവരെയാണ് അറസ്റ്റു ചെയ്തതെന്നാണ് പോലീസിന്‍റെ വിശദീകരണം.

ചര്‍ച്ച പൊളിഞ്ഞത് ഹര്‍ജിയെച്ചൊല്ലി
ശബരിമല ക്ഷേത്രത്തിലെ സ്ത്രീപ്രവേശന വിഷയത്തില്‍ സമവായത്തിനായി തിരുവിതാംകൂര്‍ ദേവസ്വം ബോര്‍ഡ് നടത്തിയ ചര്‍ച്ച പരാജയപ്പെട്ടത് പുനഃപരിശോധനാ ഹര്‍ജിയെച്ചൊല്ലി. എല്ലാ പ്രായത്തിലുമുള്ള സ്ത്രീകള്‍ക്ക് ക്ഷേത്രത്തില്‍ പ്രവേശിക്കാമെന്ന സുപ്രീംകോടതിയുടെ വിധിക്കെതിരെ പുനഃപരിശോധനാ ഹര്‍ജി നല്‍കുന്നതില്‍ ഉടന്‍ തീരുമാനം വേണമെന്നായിരുന്നു പന്തളം കൊട്ടാരത്തിന്‍റെയും തന്ത്രി കുടുംബത്തിന്‍റെയും പ്രതിനിധികളുടെ ആവശ്യം. ഹര്‍ജിയില്‍ തീര്‍പ്പുണ്ടാകുനനതുവരെ നിലവിലുള്ള സ്ഥിതി തുടരണമെന്നും ഇവര്‍ ആവശ്യപ്പെട്ടു. എന്നാല്‍ 19-നു നടക്കുന്ന യോഗത്തില്‍ പുനഃപരിശോധനാ ഹര്‍ജിക്കാര്യവും മറ്റു നിയമനടപടികളും ആലോചിക്കാമെന്നായിരുന്നു ബോര്‍ഡിന്‍റെ നിലപാട്.

തിരുവനന്തപുരം: പ്രളയ ദുരിതാശ്വാസത്തിനായി സംഭാവന സമാഹരിക്കാന്‍ മന്ത്രിമാരുടെ വിദേശയാത്ര വേണ്ടെന്നുവച്ചു. മുഖ്യമന്ത്രി മാന്ത്രം യുഎഇയിലേക്കു പോകും. മുഖ്യമന്ത്രിയും 17 മന്ത്രിമാരും 17 മുതല്‍ 21 വരെ വിദേശ സന്ദര്‍ശനത്തിന് തയ്യാറെടുത്തിരുന്നതാണ്. എന്നാല്‍ സംസ്ഥാന സര്‍ക്കാര്‍ ആവര്‍ത്തിച്ച് ആവശ്യപ്പെട്ടിട്ടും കേന്ദ്രം അനുമതി നിഷേധിച്ചതുകൊണ്ടാണ് യാത്ര മുടങ്ങിയത്. വിദേശ മലയാളികളുടെ നേതൃത്വത്തിലുള്ള സംഘടനകളാണ് മന്ത്രിമാരെ ക്ഷണിച്ചിരിക്കുന്നത്. ഇവയില്‍ പലതിനും രജിസ്ട്രേഷനോ അംഗീകാരമോ ഇല്ലെന്ന വാദമുയര്‍ത്തിയാണ് കേന്ദ്ര വിദേശകാര്യ മന്ത്രാലയം അനുമതി നിഷേധിച്ചത്.

തിരുവനന്തപുരം: വിദേശ രാജ്യങ്ങളിലേക്കുള്ള എംഎല്‍എമാരുടെ യാത്രയ്ക്കു കടിഞ്ഞാണിട്ടു കേന്ദ്ര ഇടപെടല്‍. സംസ്ഥാനത്തെ ഒട്ടേറെ എംഎല്‍എമാര്‍ കേന്ദ്രസര്‍ക്കാരിനെ അറിയിക്കാതെ വിദേശത്തേക്കു പോകുന്നുണ്ടെന്നും ഇത് ആവര്‍ത്തിക്കരുതെന്നും വ്യക്തമാക്കി കേന്ദ്ര വിദേശകാര്യ മന്ത്രാലയം. ലോക്സഭാ സെക്രട്ടേറിയറ്റ് മുഖേന സംസ്ഥാന നിമസഭാ സെക്രട്ടറിക്കു കത്തുനല്‍കി. ഇതേത്തുടര്‍ന്ന് സംസ്ഥാനത്തെ എല്ലാ എംഎല്‍എമാര്‍ക്കും നിയമസഭാ സെക്രട്ടറി മുന്നറിയിപ്പ് കൈമാറി. സംസ്ഥാനത്തുനിന്ന് ഒട്ടേറെ എംഎല്‍എമാര്‍ വിദേശരാജ്യങ്ങളിലേക്ക് അനുമതിയില്ലാതെ പോകുന്നെന്ന രഹസ്യാന്വേഷണ ഏജന്‍സികളുടെ റിപ്പോര്‍ട്ട് കണക്കിലെടുത്താണു കേന്ദ്ര ഇടപെടലെന്നാണു സൂചന. മറ്റു ചില സംസ്ഥാനങ്ങളില്‍നിന്നുള്ള എംഎല്‍എമാരും അനധികൃത സന്ദര്‍ശനം നടത്തിയവരുടെ കൂട്ടത്തിലുണ്ടെങ്കിലും പ്രവാസി മലയാളി സംഘടനകളുടെ ശക്തമായ സാന്നിധ്യം കാരണം കേരളത്തില്‍ നിന്നുള്ള എംഎല്‍എമാരാണു യാത്ര നടത്തിയവരില്‍ ഏറെയും. പാര്‍ട്ടിക്കുവേണ്ടി പിരിവിനു പോയ എംഎല്‍എമാരുമുണ്ട്. വിദേശ രാജ്യങ്ങളില്‍ പോയ എംഎല്‍എമാര്‍ അവിടെ പല പ്രമുഖരുമായി കൂടിക്കാഴ്ച നടത്തിയതും സംശയദൃഷ്ടിയോടെയാണ് കേന്ദ്രം കാണുന്നത്.

Sponsored Advertisments