Kerala Express

ജിഷ വധം: അമീറുളിനു വധശിക്ഷ

കൊച്ചി: പെരുമ്പാവൂരിലെ നിയമവിദ്യാര്‍ത്ഥിനി ജിഷയെ മാനഭംഗപ്പെടുത്തി കോലപ്പെടുത്തിയ കേസിലെ പ്രതി ആസാം സ്വദേശി മുഹമ്മദ് അമീറുള്‍ ഇസ്ലാമിനു (23) വധശിക്ഷ. ക്രൂരവും പൈശാചികവുമായ കൃറ്റകൃത്യമാണു പ്രതി ചെയ്തതെന്നു വിലയിരുത്തിയാണ് എറണാകുളം പ്രിന്‍സിപ്പല്‍ സെഷന്‍സ് ജഡ്ജി പരമാവധി ശിക്ഷ വിധിച്ചത്. കുറ്റകൃത്യം ഡല്‍ഹിയിലെ നിര്‍ഭയ കേസിലേതിനു സമാനമാണെന്നും സ്ത്രീകള്‍ക്ക് അവരുടെ അന്തസും അഭിമാനവും ഉയര്‍ത്തിപ്പിടിക്കുന്നതിനും പൊതുവികാരം ഉണരാനും ഈ വിധി ഉപകരിക്കുമെന്നും വിധിന്യായത്തില്‍ ചൂണ്ടിക്കാട്ടി. പീഡിപ്പിക്കാന്‍ ശ്രമിച്ചപ്പോള്‍ എതിര്‍ത്തതിനുള്ള വിദ്വേഷത്താല്‍ 38 മുറിവുകളാണ് രഹസ്യഭാഗങ്ങളിലടക്കം ഏല്‍പ്പിച്ചത്. വെള്ളത്തിനായി യാചിച്ചപ്പോള്‍ ഒട്ടും ദയ കാണിക്കാതെ മദ്യമാണു പ്രതി ഒഴിച്ചുകൊടുത്തത്. മരണത്തിനു മുന്‍പ് അങ്ങേയറ്റത്തെ വേദനയും പീഡനവുമാണു പ്രതി ഏല്‍പിച്ചതെന്നു സാഹചര്യത്തെളിവുകളില്‍നിന്നു വ്യക്തമാണെന്നും കോടതി പറഞ്ഞു.

സാന്ത്വനമായി രാഹുല്‍

തിരുവനന്തപുരം: നിങ്ങള്‍ക്കു നഷ്ടപ്പെട്ടതിനു വിലയിടാന്‍ ആര്‍ക്കും കഴിയില്ല. പക്ഷേ, ഞങ്ങള്‍ നിങ്ങളോടൊപ്പമുണ്ടാകും. ഞങ്ങളാല്‍ കഴിയുന്ന സഹാവുമായി ദുരന്തമേഖലയില്‍ വരാന്‍ വൈകിയതിനു മാപ്പ് ചോദിക്കുന്നു. ഓഖി ചുഴലിക്കാറ്റ് ദുരന്തം വിതച്ച തീരദേശ പ്രദേശങ്ങളിെലെ സര്‍ശനത്തിനിടെ പൂന്തുറ സെന്‍റ് തോമസ് പള്ളിയിലെത്തിയ നിയുക്ത കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ വാക്കുകളാണിത്. സുരക്ഷാ വേലിക്കെട്ടുകള്‍ ഭേദിച്ചു മത്സ്യത്തൊഴിലാളികളുടെ ഇടയിലേക്ക് ഇറങ്ങിച്ചെന്നാണ് രാഹുല്‍ അവരുടെ ദുരിതങ്ങള്‍ നേരിട്ടു ചോദിച്ചറിഞ്ഞത്. അലമുറയിട്ടു കരഞ്ഞ അമ്മമാര്‍ക്കു മുന്നില്‍ അവരുടെ വേദനകള്‍ കേട്ട് അരമണിക്കൂറോളം രാഹുല്‍ പൂന്തുറപ്പള്ളിയില്‍ ചെലവഴിച്ചു

ഓഖി: കാണാതായവര്‍ക്കും ഉടന്‍ നഷ്ടപരിഹാരം

തിരുവനന്തപുരം: ഓഖി ദുരന്തത്തില്‍ കാണാതായവരുടെ ആശ്രിതര്‍ക്കും മരിച്ചവര്‍ക്കുള്ള നഷ്ടപരിഹാരം ഒരു മാസത്തിനകം നല്‍കാന്‍ മന്ത്രിസഭായോഗം തീരുമാനിച്ചു. ഇതിനായി കാണാതായവരുടെ പേരുകളില്‍ എഫ്ഐആര്‍ രജിസ്റ്റര്‍ ചെയ്യുമെന്ന് മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ അറിയിച്ചു. പ്രകൃതി ദുരന്തങ്ങളില്‍ കാണാതാകുന്നവര്‍ക്ക് നഷ്ടപരിഹാരം നല്‍കാന്‍ ഏഴു വര്‍ഷം വേണ്ടിവരുന്ന വ്യവസ്ഥ മാറ്റിക്കൊണ്ടാണ് സര്‍ക്കാര്‍ സുപ്രധാനമായ ഈ തീരുമാനം എടുത്തത്. ഇതിന്‍റെ നടപടികള്‍ ത്വരിതപ്പെടുത്താന്‍ റവന്യൂ ഉദ്യോഗസ്ഥര്‍ക്ക് നിര്‍ദ്ദേശം നല്‍കി. ചെറുവള്ളങ്ങളില്‍ മത്സ്യബന്ധനത്തിന് പോയി തിരിച്ചുവരാത്ത 104 പേരെ പറ്റിയുള്ള ആശങ്ക ശക്തമായിരിക്കെയാണ് സര്‍ക്കാരിന്‍റെ ഈ തീരുമാനം. ഡിസംബര്‍ 13ന് 11 മൃതദേഹങ്ങള്‍കൂടി കണ്ടെത്തിയതോടെ 65 മരണം സ്ഥിരീകരിച്ചു. ഓഖി ദുരന്തത്തിനിരയായ കുടുംബങ്ങളെ സഹായിക്കാന്‍ സര്‍ക്കാര്‍ രൂപീകരിച്ച ഫണ്ടിലേക്ക് ജീവനക്കാര്‍ മൂന്നു ദിവസത്തെ വേതനം സംഭാവന ചെയ്യണമെന്ന് മുഖ്യമന്ത്രി പിണറായി വിജയന്‍ വാര്‍ത്താ സമ്മേളനത്തില്‍ അറിയിച്ചു.

Sponsored Advertisments